Flamurtari, 20 milionë lekë për fitoren në Gjirokastër

Për të arritur me çdo kusht qëndrimin në elitë, drejtuesit e klubit vlonjat po provojnë të gjitha mënyrat, pasi e kanë të qartë se mbijetesa është shumë e vështirë. Për ndeshjen e radhës në Gjirokastër ata kanë menduar ta motivojnë ekipin me një shpërblim, që mund të kapë shifrën e 20 milionë lekëve, por kjo shumë nuk është e konfirmuar zyrtarisht. Vlonjatët duan 3 pikët ndaj Luftëtarit, në një transfertë, që cilësohet mjaft e vështirë. Burime nga klubi kuqezi kanë pohuar për gazetën se skuadrës do t’i akordohet shpërblim për çdo ndeshje, por kuptohet që vlera do të ndryshojë. Më shumë rëndësi kanë ndeshjet jashtë fushe, ku shifrat e shpërblimit do të jenë më të larta. Në ndeshje të tilla, siç është kjo e radhës me Luftëtarin në Gjirokastër, shkalla e vështirësisë është e lartë. Për një fitore të mundshme në Gjirokastër, lojtarët e Flamurtarit pritet të përfitojnë deri në 20 milionë lekë të vjetra, por mbetet për t’u parë se sa do të jenë në gjendje ata për ta mposhtur Luftëtarin në fushën e tij.

Por kjo transfertë nuk është e vetmja sa u takon shpërblimeve, sepse kjo praktikë do të ndiqet deri në fund të kampionatit. Të njëjtat burime në klubin e Flamurtarit saktësojnë se do të ketë shpërblim financiar për çdo fitore edhe në Vlorë. Por, në raste të tilla, vlera e shpërblimit do të jetë 10 milionë lekë të vjetra, pra gjysma e shifrës për fitoret e mundshme në transfertë. Mësohet se skuadra nuk do të përfitojë asnjë shpërblim në rast barazimi, si për ndeshjet shtëpiake, ashtu edhe për ato në transfertë. Barazimi në takimet e mbetura në Vlorë nuk mund të konsiderohet pozitiv, edhe pse do të luhet me disa skuadra të vështira, siç është edhe Partizani. Duke parë renditjen dhe rrezikun e rënies, klubi vlonjat ka menduar që motivimi më i madh të jetë për ndeshjet jashtë fushe, ku fitorja do të kishte vlera të dyfishta. Duket një ngacmim për lojtarët për të kërkuar maksimumin nga këta të fundit. Klubi po luan edhe një tjetër “kartë”, këtë të premiove, që pritet të ketë ndikimin e vet në qëndrimin e Flamurtarit mes më të mirëve të futbollit shqiptar. Mbetet për t’u parë se sa fitore do të arrijnë vlonjatët në këto 8 javë të mbetura./sport ekspres