Dalin mesazhet/ Ish futbollisti i Luftëtarit i kërkon borxhet, Tavo i përgjigjet: Thirri mendjes se…

Vijon historia e debatit në distancë mes Vangjel Zguros dhe Luftëtarit. Mbrojtësi, tashmë i Kamzës, kërkoi borxhet që i ka Luftëtari, ndërsa klubi gjirokastrit nxjerr një dokument ku thuhet se Zguro nuk ka asnjë detyrim apo paga për të marrë. Gjithashtu, Luftëtari ka shtuar se lagimin e kërkoi me çdo kusht Zguro, që kërkonte të shkonte fillimisht te Partizani.

Megjithatë, Zguro ka reaguar duke hedhur poshtë pretendimet e Luftëtarit, sepse ka publikuar mesazhet telefonike me presidentin e Luftëtarit, Grigor Tavo.

Në mesazhe lexohet se Zguro i ka kërkuar Tavos që t’ia sqarojë një herë e mirë nëse e donte te Luftëtari, apo nuk e dëshironin më në ekip. Gjithashtu, tregon edhe mesazhet ku i kërkon pagat e prapambetura Tavos, ndërsa ky i fundit i shkruan: “S’ka mbetur njeri pa paguar te Luftëtari, madje i ke firmosur vetë.

MESAZHET E ZGUROS

“Shefi mirëmëngjesi. Llambro nuk ma hapi telefonin. A ka mundësi të më japësh një zgjidhje. Po më do në ekip të nisem për Turqi, po s’më do më thuaj sot të iki të marr letrat në Gjirokastër, nuk pret puna deri të martën se ngelëm rrugëve o shefi, çfarë ju kam bërë se s’po e kuptoj pse duhet të rrijë zvarrë mo shef. Pyet stafin në telefon, na duhet Zguro apo nuk na duhet, të lutem se nuk pret puna deri të martën. Pse duhet të më mbash zvarrë deri të martën se kuptoj”

“Shefi, po ke mundësi të lutem më kthe një përgjigje, se nuk po e kuptoj pse më lini kështu, as këtej e as andej… Më doni, të nisem, s’më doni, të marr letrat. Pse duhet të pres, ma ndaj sot këtë punë. Unë mbaj familjen”.

“S’e kuptoj pse duhet të sillesh kështu me mua, kur unë kam bërë çdo të mirë për Luftëtarin dhe ti e di shumë mirë që kam lekë pa marrë që nga vjet dhe prapë kam ulur kokën, kam punuar. Është gjynah që të më mbash lekët e fëmijës. Rrija 8 orë larg shtëpisë për ato lekë”.

MESAZHI I TAVOS

“Thirri mendjes dhe lëri presionet. S’ka mbet njeri pa paguar te Luftëtari, madje i ke firmosur vetë. Pyet Marinin, pyet Naimin e Kamzës që të mori, se do ishe rrugëve se nuk ke mend”.