Arma që vrau Ibrahim Bashën në Lazarat, një snajper rus “Dragunov” 7.5 mm

Arma me të cilën u qëllua për vdekje efektivi i RENEA-s, Ibrahim Basha, mëngjesin e së mërkurës në Lazarat, është një snajper me precizion të lartë, edhe pse me kalibër të vogël. E modifikuar për të qëlluar edhe me breshëri, arma e modelit rus, një snajper “Dragunov”, është e kalibrit 7.5 milimetra. Provat e gjetura në vendin nga ku u qëllua me armë RENEA, i kanë çuar ekspertët e grupit hetimor në këtë përfundim sa i përket armës së krimit.

Burime nga grupi hetimor thanë për gazetën “Panorama” se lloji i armës është përcaktuar nga provat e mbledhura në vendngjarje, mes tyre edhe gëzhojat e kësaj arme, e cila rezulton se ka qëlluar më shumë se njëherë. Snajperi model “Dragunov” është një armë prodhim rus dhe hetuesit dyshojnë se kjo armë përdoret nga vëllezërit Arbion e Alban Aliko, të cilët vazhdojnë të jenë personat më të kërkuar në Shqipëri.