Kush e përvetësoi faqen në Facebook të Bashkisë Libohovë?

Prej disa kohësh Bashkia Libohovë ka pasur një profil në rrjetin social Facebook, ku kumunikonte me qytetarët dhe pasqyronte virtualisht evente apo aktivitete të ndryshme. Normalisht që një faqe e tillë, duhet konsideruar si pronë e institucionit dhe pavarësisht se ndryshojnë kryetarët apo personat që merren me administrimin e saj, faqja mbetet aty. Por nuk ka ndodhur kështu në rastin e Bashkisë Libohovë.

Pasditen e sotme faqes i është ndërruar emri nga “Bashkia Libohovë”, në “Qyteti Libohovë”. Fotografia me logon e Bashkisë Libohovë është hequr nga faqja dhe është zëvendësuar me një foto tjetër, por që nuk është vështirë të kuptosh përmes postimeve të mëparshmë se bëhet fjalë për faqen e Bashkisë.

Sa herë Libohova Online ka dashur të marrë informacion zyrtar nga Bashkia Libohovë ka komunikuar përmes kësaj faqe, të cilën e administronte ish-nënkryetari i Bashkisë, Adil Xhelili. Nuk dihen motivet përse faqes i është ndryshuar emri dhe a është bërë ky ndryshim nga ish-nënkryetari i Bashkisë Libohovë. Ne tentuam të komunikojmë me këtë faqe, për t’i marrë informacion rreth këtij ndryshimi, por deri më tani nuk kemi një përgjigje.

Sidoqoftë është lehtësisht e dukshme që në e faqen e Bashkisë Libohovë, pavarësisht ndryshimit të emrit, postimet e hershme janë po aty.

Libohova Online  u interesua pranë Bashkisë Libohovë për këtë cështje dhe na është komunikuar që nuk kanë akses në faqe, pasi personi i mëparshëm që e kishte nën administrim (ish-nënkryetari, Adil Xhelili), ishte shprehur që “nuk e mbante mend kodin”. Por ndërkohë sot pasdite faqes i është ndryshuar emri nga “Bashkia Libohovë” në “Qyteti Libohovë”.

Një veprim i tillë bën përgjegjës personin/personat që e kanë administruar deri më tani faqen si dhe kryebashkiaken e re Luiza Mandi, që duhet të ushtrojë të gjithë autoritetin ligjor për të mos lejuar keqpërdorimin e kësaj faqe. Kujtojmë që ka qenë deri më sot faqja zyrtare e Bashkisë Libohovë në rrjetin social Facebook. Prej sot e kanë bërë “Qyteti Libohovë”, njësoj si profili i hershëm “Qyteti i Libohovës”, që është pjesë e sajtit LibohovaOnline.com