Pranverë fluturimesh në jug, ju pret “Gjiro Open Air”

Pranverë fluturimesh në Gjirokastër. Dhjetra pilotë do të garojnë për dy ditë në qiell të lirë në kuadër të etapës së tretë të kampionatit kombëtar të fluturimeve të lira. Aeroklubi i Gjirokastrës në bashkëpunim me Albanian Open organizon “Gjiro Open Air” nga datat 20 deri në 22 mars 2015.

Pilotët do të nisin fluturimin nga Çajupi, ndërsa me akrobacitë e tyre në ajër do të ofrojnë pamje spektakolare për qytetarët në Gjirokastër, Libohovë, Antigone, Lunxhëri, Labovë etj.  

Pjesë e këtij turneu janë edhe vizita në pazarin historik të Gjirokastrës, në Libohovë, në qytetin antik të Antigonesë, në Saraqinisht e në Labovën e Kryqit, duke i dhënë kështu edhe një dimension turistik këtij eventi. Ceremonia e dhënies së çmimeve për fituesit do të organizohet në kalanë e Gjirokastrës, pikërisht në atë skenë ku do të zhvillohet më vonë edhe Festivali Folklorik Kombëtar.

“Gjiro Open Air” është ndër të tjera edhe një ngjarje e rëndësishme që promovon pasuritë turistike e kulturore të rajonit të Gjirokastrës.