Zemërimi i Lazaratit për humbjen, vritet një polic i RENEA-s, plagosen dy të tjerë

Ajo që nuk ndodhi gjatë operacionit antidrogë të një viti më parë, fatkeqësisht ndodh tani. Një efektiv i forcave speciale RENEA ka humbur jetën dhe dy të tjerë kanë mbetur të plagosur gjatë një përleshjeje me armë zjarri në Lazarat.

Efektivi i vrarë është identifikuar si Ibrahim Basha. Ai ka qenë pjesë e Batalionit Special të Ushtrisë, ku numëron disa misione në Afganistan. Prej 6 muajsh ishte bër pjesë e Forcave Speciale RENEA.Te plagosurit jane efektivet J.J dhe P.K.

Lajmi konfirmohet nga Policia e Shtetit. Dyshohet se grupi i Forcave Speciale ka rënë nën një breshëri të rëndë zjarri, pikërisht në momentin kur ka ndërmarrë operacionin për të lokalizuar dhe arrestuar grupin, nga ku gjatë natës u raportuan të shtëna me armë zjarri.

Dy efektivët e plagosur janë shoqëruar drejt Spitalit të Gjirokastrës. Raportohet se njëri prej tyre është në gjendje të rëndë.

Forca të shumta policore janë nisur drejt Lazaratit për t’iu bashkuar atyre që ndodhen tashmë atje. Drejt fshatit problematik është nisur edhe prokurori i Krimeve të Rënda, Adnand Xholi.

Uniformat blu kanë rrethuar zonë duke ngritur postblloqe të shumta në të gjitha rrugët hyrëse dhe dalëse të fshatit, duke kontrolluar imtësisht çdo lëvizje të dyshimtë, deri në gjetjen dhe kapjen e autorëve.
Krismat vijnë vetëm pak ditë pas zgjedhjeve dhe ndërkohë që e majta ka korrur fitore në Gjirokastër.

Një dyshim për reagimin me armë mund të lidhet edhe me këtë rezultat, po të kesh parasysh se së fundi rrjetet sociale apo profile të banorëve të Lazaratit janë mbushur me trishtim dhe reagim jo të mirë për rezultatin në Gjirokastër.